काठमाडौं : महिला टी-२०आई शृंखलाको अन्तिम खेलमा पनि नेपाल पराजित भएको छ। टियु क्रिकेट मैदानमा शुक्रबार भएको खेलमा नेपाल थाइल्यान्डसँग ७ विकेटले पराजित भएको हो। नेपालले दिएको ८२ रनको लक्ष्य थाइल्यान्डले १७ ओभरमा ३ विकेटको क्षतिमा पूरा गर्यो।
थाइल्यान्डका लागि कप्तान नरुएमोल चाइवाइले अविजित २७ रन बनाइन्। त्यस्तै नन्नापाटले २३ न र नाट्टाया बुचाथामले ११ रन बनाए। यसअघि टस जितेर ब्याटिङ गरेको नेपालले निर्धारित ओभरको खेललमा ७ विकेटको क्षतिमा ८१ रन बनाएको थियो। नेपालका लागि सम्झाना खड्काले सर्वाधिक १७ रन बनइन्। त्यस्तै कविता जोशीले १४, इन्दु बर्माले १० र रजमती ऐरीले ११ रन बनाइन्। अन्य खेलाडीले दोहोरो अंकको रन जोड्न सकेनन्।
शृंखलाको पहिलो खेलमा नेपाल नेदरल्यान्ड्ससँग २० रनले पराजित भएको थियो। दोस्रो खेलमा थाइल्यान्डसँग ४ विकेटले पराजित भएको नेपाल तेस्रो खेलमा नेदरल्यान्ड्ससँग १५ रनले पराजित भयो। त्यस्तै चौथो खेलमा थाइल्यान्डसँग ५ विकेटले पराजित भएको नेपाल पाँचौं खेलमा नेदरल्यान्डससँग १० विकेटले पराजित भएको थियो।
खेलाडीहरूले पराजित हुनुमा फिटनेसलाई दोष दिएका छन्। उनीहरूले फिटनेस नहुँदा खेलमा पराजय व्यहोर्नुपरेको बताएका छन्।