सकियो धादिङ लोक सांस्कृतिक महोत्सव : ७० हजार बढि दर्शकले गरे अवलोकन,कारोबार कति ?

धादिङ । धादिङ जिल्लामै पहिलो पटक भएको धादिङ लोक सांस्कृतिक महोत्सव सकिएको छ ।

राष्ट्रिय लोक तथा दोहोरी गीत प्रतिष्ठान धादिङ र सामुदायिक संचार तथा विकास केन्द्र धादिङको संयुक्त आयोजना तथा नीलकण्ठ नगरपालिकाको संरक्षकमा सदरमुकाम धादिङबेशी स्थित खुल्लामञ्चमा माघ १० गतेदेखि सुरु भएको लोक सांस्कृतिक महोत्सव-२०८१ मंगलबार समापन गरिएको हो ।

मंगलबार नीलकण्ठ नगरपालिकाका प्रमुख एवं नेपाल नगरपालिका संघका अध्यक्ष भिम प्रसाद ढुंगानाको प्रमुख आतिथ्यतामा महोत्सव समापन गरिएको हो ।

समापन समारोहलाई सम्बोधन गर्नुहुँदै नगर प्रमुख ढुंगानाले लोक साँस्कृतिक महोत्सवले जिल्लाको लोकसाँस्कृतिक, धुन, नृत्य र गीतहरू लगायतका विभिन्न पक्षको विकास, विस्तार र जगेर्ना गरेको बताउनुभयो ।

वर्तमान युवा पीढि आफ्नो मौलिकतालाई बिर्सिएर पाश्चात्य संस्कृतिमा रमाउन थालेको अहिलेको अवस्थामा यस्ता महोत्सवले संस्कृति प्रवद्र्धनका निम्ति महत्वपूर्ण रहेको भन्दै आगामी दिनमा नगरपालिकाले यस्ता महोत्सवहरु आयोजना गर्दै जाने बताउनुभयो ।

ढुङ्गानाले महोत्सव भव्यताका साथ सफल भएकोमा आमदर्शक र आयोजकलाई धन्यवाद् दिदेँ धादिङ आफैँमा सौन्दर्यले भरिपूर्ण रहेकाले शिक्षा, खेलकुद, धार्मिक क्षेत्र, भाषा, साहित्य लगायतलाई समेटेर पर्यटनको राजधानीको रुपमा विकास गर्नुपर्ने बताउनुभयो ।

समापनको दिन राष्ट्रिय लोक तथा दोहोरी गीत प्रतिष्ठानकी केन्द्रिय अध्यक्ष रिता थापा मगर, लोकप्रिय गायक शिव परियार, किस्न रेउले, जुना श्रीस मगर, प्रकाश गौतम र मिलन बि.क.को प्रस्तुती रहेको थियो ।

महोत्सव मुल आयोजक समितिका संयोजक दिपक कोइरालाका अनुसार महोत्सवमा ७० हजार भन्दा बढि दर्शकले अवलोकन गरेका छन् ।

टिकट काटेर हेर्ने र महोत्सवलाई हरेक तरवबाट सहयोग पुर्याउने तथा स्टल व्यवसायीहरु सबै गरेर ७० हजार भन्दा माथि दर्शकले अवलोकन गरेका र १ करोड भन्दा बढि कारोबार भएको संयोजक कोइरालाले बताउनुभयो।

माघ १० गतेदेखी ‘लोक संस्कृति प्रवर्धनको सार पहिचान, पर्यटन र समृद्धिको मूल आधार’ भन्ने मूल नारासहित सुरु भएको महोत्सव २० गतेसम्म चल्ने भनिएपनि विविध कारण र आवश्यकताको मध्यनजर गरेर २२ गते समापन गरिएको उहाँको भनाई छ।

‘जिल्लाको रैथाने मौलिक लोक संस्कृति तथा सांस्कृतिक पहिचानको प्रवद्र्धन र परम्पराको जगेर्ना गर्ने उद्देश्यले आयोजना गरिएको महोत्सव सभ्य र भव्य बनाउन सहयोग पुर्याउने सबैप्रति आयोजक समिति आभारी छौं ।’ मुल आयोजक समितिका संयोजक कोइरालाले भन्नुभयो ।

राष्ट्रिय लोक तथा दोहोरी गीत प्रतिष्ठान धादिङकी अध्यक्ष कमला गैरेले जिल्लामा पहिलो पटक भएको यो महोत्सवमा मौलिक लोक संस्कृति, लोकदोहोरी, मेन्दोमायाँ, कौरा, चुड्का, घाटु, वालन, ठाडोभाका देखि खैजडी भजन, नौमती र झ्याउरे गीत लगायतका प्रचलित सांस्कृतिक पहिचान र प्रतिभाहरुले रौनक थपेको बताउनुभयो।

महोत्सवबाट जुटेको आर्थिक श्रोतबाट जिल्लाका सम्पूर्ण कलाकारहरुलाई अप्ठेरो परेको बेला आवश्यक सहयोग गर्न राष्ट्रिय लोक तथा दोहोरी गित प्रतिष्ठान धादिङ मार्फत परिचालन हुने गरि कलाकार कल्याणकारी कोष स्थापना गर्ने लक्ष्य राखिएको उहाँको भनाई छ ।

महोत्सवको प्रमुख आकर्षणको रुपमा धादिङको अन्तरपालिका लोक दोहोरी प्रतियोगिता रहेको थियो ।

उक्त प्रतियोगितामा ज्वालामुखी गाउँपालिका प्रथम भएको छ।ज्वालामुखी गाउँपालिकाबाट सहभागी संगिना मगर र सुरेन्द्र मगरको समुहले गजुरी गाउँपालिकाका कलाकार सफल अर्याल र सिता बराल लाई पछि पार्दै विजयी भएका हुन् ।

प्रतियोगितामा प्रथम भएको ज्वालामुखीले नगद ५० हजारसहित प्रमाणपत्र पाएको छ भने द्धितिय भएको गजुरीले ३० हजार नगदसहित प्रमाणपत्र पाएको छ ।

त्यस्तै सिद्धलेक गाउँपालिकाको प्रदिप बराईली र भावना अर्यालको समुह र नीलकण्ठ नगरपालिकाका सुरेन्द्र न्यौपाने र सन्जु लामाको समुहले भने बराबर अंक प्राप्त गरि तृतिय भएका छन् ।तृतिय भएका दुवै समुहले क्रमश १५/१५ हजार रुपियाँ नगदसहित प्रमाणपत्र पाएका छन् ।

यस वर्ष सहभागीहरु निकै कडा प्रतिस्पर्धीहरु रहेकाले नतिजा निकाल्न निकै कठिन परेको भन्दै केही अंक भारले मात्र प्रथम, द्धितिय र तृतिय भएका मुल आयोजक समितिका साँस्कृतिक संयोजक तथा निर्णायक समितिका भरत बराकोटीले जानकारी दिनुभयो ।

लोक तथा दोहोरी क्षेत्रमा धादिङका कलाकाहरु अब्बल रहेको बराकोटीको भनाई छ ।

जिल्लामा भएको यस प्रतियोगितामा प्रथम, द्धितिय र तृतिय भएका टिमहरुलाई चितवनमा हुने रनिङ शिल्ड दोहोरी प्रतियोगितामा सहभागी हुने बराकोटीले बताउनुभयो ।